每個人都一定會經歷過樽頸位。
喺工作上再無進步空間令你下再變得顯眼；喺創作上靈感停滯不前令你喪失靈魂；喺愛情上失去花火令二人關係進退兩難。
我自己都曾經喺各方面都遇過樽頸位。的確，處於樽頸位嘅時候令人好沮喪，我甚至試過因為跳舞上因為沖唔出去樽口而自己匿埋喺屋企喊。後來我先發現， 其實樽頸位喺你下一個突破位嘅前奏，只要你能夠突破樽頸位就能夠將自己推去下一個高峰。
要突破樽頸位嘅先決條件係首先你要接受而家嘅自己能力不逮，已經應付唔到下一個階段嘅事實。之後就要嘗試還原基本步，改變過去所使用嘅方法同轉變一下你固有嘅思維。
工作多年仍然唔能夠升職加薪即係代表你要好好去進修一下；創作上來來去去都係咁即係代表你要重新審視自己嘅基本功；二人感情進入膠著狀態即係代表要一齊反省找回當初相愛嘅初衷。我成日都話樽頸位就好似打機嘅BOSS一樣，一個BOSS比一個BOSS勁，所以一關比一關要花更多時間去鍛鍊技巧去打贏佢。如果你中間覺得氣餒而放棄嘅話，就永遠都唔能夠得到玩完整個遊戲嘅喜悅。你要相信呢個樽頸位係帶動你去下一個突破嘅必經階段；只有當你去到樽頸時刻，你先會認真回顧自己嘅基礎問題，同時更看清同了解自己。
最後，你需要嘅就係創意同勇氣去打破一直困住你嘅玻璃樽。反正你嘅目標就係要離開個樽，唔需要理佢最後係咪完整無缺，就算你打橫咁爆出去又如何？
共勉之！
#女人像鹽 #樽頸位
Search